Ma’kadami tu Daud nakua: Denparaka torro tu bati’na Saul, angku pogau’ kamasokanan lako kalena belanna Yonatan?
2
Denmi misa’ tau lan tongkonan layukna Saul, disanga Ziba. Natambaimi tau mennolo lako Daud, anna ma’kada tu datu lako nakua: Ikomoraka Ziba? Mebalimi nakua: Io puang.
3
Nakuami datu: Denparaka torro tu bati’na Saul, angku pogau’ kamaturu-turuanNa Kapenomban lako kalena? Ma’kadami tu Ziba lako datu, nakua: Denpa misa’ muane, anakna Yonatan, tu kupi’ patomali.
4
Ma’kadami datu nakua: Umbara nanii? Mebalimi Ziba lako datu, nakua: Lan sia banuanna Makhir, anakna Amiel dio Lodebar.
5
Mesuami datu Daud unnalai lan mai banuanna Makhir, anakna Amiel, dio mai Lodebar.
6
Saemi tu Mefiboset, anakna Yonatan, anakna Saul mennolo lako Daud, sia tukku rokko padang anna menomba. Nakuami Daud: E Mefiboset. Mebalimi nakua: Io, Puang.
7
Ma’kadami Daud lako kalena nakua: Da mumataku’, belanna inang la umpogau’na’ kamasokanan lako kalemu belanna ambe’mu, Yonatan, la kupasule nasang tu mintu’ pa’lakna nene’mu, sia tontong dukaki’ la kumande sola.
8
Tukkumi menomba anna ma’kada nakua: Tau apara te taummi, ammi la umpessaileiri, anna butungna’ to misa’ asu mate?
9
Mangkato natambaimi datu tu Ziba, taunna Saul, nama’kada lako nakua: Mintu’ tu apanna Saul sia mintu’ rapunna, kukamasean anakna puangmu Yonatan.
10
La mukarangan tu pa’lak iato, iko sia anakmu muane sia mintu’ kaunammu, sia la muposara’ tu burana, anna kandei anakna puangmu. Iatu Mefiboset, anakna puangmu, la tontongna’ kumande sola. Iatu Ziba sangpulo lima tu anakna muane, anna duangpulo tu kaunanna.
11
Mebalimi tu Ziba lako datu nakua: Mintu’ tu kadanna puangku datu, kuturu’ nasang. Susimoto tu Mefiboset kumande sola Daud susi misa’ anak datu.
12
Iatu Mefiboset den misa’ anakna muane bitti’pa disanga Mikha. Sia mintu’ tu to torro lan banuanna Ziba, taunna nasang Mefiboset.
13
Susito torromi tu Mefiboset dio Yerusalem, belanna tontong kumande sola datu. Iatu lette’na kupi’ patomali.